काठमाडौँ । धितोपत्र बजारमा सेयर कारोबार मापक नेप्से परिसूचक दोहोरो अङ्कले उकालो लागेको छ । नेपाल स्टक एक्सचेञ्जका अनुसार नेप्से परिसूचक १३.५१ अङ्कले उकालो लागेर २०३०.५५ मा पुगेको छ । ठूला कम्पनीको कारोबार मापन गर्ने सेन्सेटिभ परिसूचक १.९० अङ्कले उकालो लागेर तीन सय ६०.२७ मा पुगेको छ । कारोबार भएका १३ उपसमूहमध्ये तीन उपसमूहको सेयर मूल्यमा गिरावट आउँदा १० उपसमूहको सेयर मूल्य भने उकालो लागेको छ ।
८९ लाख २९ हजार एक सय ५२ कित्ता सेयर तीन अर्ब १९ करोड ९२ लाख पाँच हजार आठ सय २० मूल्यमा कारोबार भयो । नेप्सेका अनुसार कारोबारका आधारमा नेपाल रिइन्स्योरेन्स कम्पनी शीर्ष स्थानमा छ ।कम्पनीको ५६ करोड २० लाख बराबरको कारोबार भयो । शिवम् सिमेन्ट १६ करोड ४१ लाख २२ हजार आठ सय ६२, सोनापुर मिनरल्स १३ करोड ४१ लाख ४२ हजार चार सय ८४, मैलुङ हाइड्रोपावर रु १३ करोड ३७ लाख ७४ हजार तीन सय ६१ र हाथवे इन्भेस्टमेन्टको नौ करोड ७९ लाख ५६ हजार तीन सय ५६ बराबरको कारोबार भई शीर्ष पाँचभित्र पर्न सफल भएका छन् ।
नेप्सेका अनुसार पिपल्स हाइड्रोपावरको शेयर मूल्यमा सकारात्मक सर्किट लागेको छ । चिर्खवा हाइड्रोपावर ८.९७, मध्य भोटेकोशी जलविद्युत् कम्पनी ६.०८, बुद्धभूमि नेपाल हाइड्रोपावर ५.९६ र हाथवे इन्भेस्टमेन्टका लगानीकर्ताले ५.६४ प्रतिशतले कमाएका छन् । कारोबार भएकामध्ये एक सय ७६ कम्पनीको सेयर मूल्यमा वृद्धि भएको छ ।
त्यस्तै, एनआइसी एसिया ग्रोथ फण्ड दोस्रो ६.२१, सामलिङ पावर कम्पनी ५.०२, बोटलर्स नेपाल तराई ४.३५, एनएमबी ५० ३.८८ र हिमालयन बैंकको सामूहिक लगानी कोषका लगानीकर्ताले ३. ८५ प्रतिशतले गुमाएका छन् । कारोबार भएकामध्ये ५९ कम्पनीको सेयर मूल्यमा गिरावट आएको छ । सेयर कारोबार हुने साताको अन्तिम दिनसम्म आइपुग्दा बजार भने उकालो लागेर बन्द भएको छ । सोमबार उच्च अङ्कले वृद्धि भई सकारात्मक सर्किट लागेर बन्द भएको थियो । मङ्गलबार भने बजार पुन: उच्च अङ्कले नै ओरालो लागेको थियो । नयाँ अर्थमन्त्रीलाई स्वागत गर्दै बुधबार पनि बजारले हरियो झण्डा देखाएको थियो । बिहीबार पनि नेप्से परिसूचक उकालो लागेर बन्द भएको छ ।
